Dita pa makina

Qindra qytetarë i janë bashkuar gjate ditës së sotme një sërë aktivitetesh të organizuara nga Bashkia e Tiranës në pjesën sheshit “Skënderbej dhe atë të Bulevardit “Dëshmorët e Kombit”, duke shijuar kështu mungesën e makinave dhe të trafikut, si lojërat dhe koncertet e ndryshme. Pjesë e këtyre aktiviteteve u bë edhe nënkryetari i Bashkisë së Tiranës, Arbian Mazniku, i cili e cilësoi “Ditën pa makina” si një ndër traditat e reja që Bashkia kërkon të sjelle në qytet, por edhe si një prelud i faktit që së shpejti sheshi “Skënderbej” do të kthehet në një shesh tërësisht pedonal.

“Kjo është një pjesë e filozofisë së Bashkisë së Tiranës për t’u dhënë gjithnjë e më shumë hapësira qytetarëve, këmbësorëve, biçikletave, në mënyrë që qyteti të jetë i të gjithëve. Kur dikush është në makinë, në një mënyrë apo në një tjetër, ai është i ndarë nga të jetuarit së bashku, është në një hapësirë të vogël dhe zë hapësirën që u përket të gjithë qytetarëve. Filozofia e Bashkisë eshte që qyteti duhet të jetë i të gjithëve dhe në mënyrë që të përdoret sa më shumë nga të gjithë”, tha Mazniku. Ai shtoi se kjo është një filozofi, e cila po përqafohet në mënyrë të vazhdueshme nga shumë kryeqytete të Evropës, për t’u dhënë gjithnjë e më shumë hapësirë qytetarëve, biçikletave këmbësorëve dhe për ta bërë jetën pak më sociale, për të qëndruar më shumë pranë me njeri tjetrin.

Gjithashtu ai bëri të ditur se deri në momentin që do të fillojnë punimet në sheshin “Skënderbej” Bashkia e Tiranës ka vendosur që çdo ditë e diele të jetë pa makina për qendrën e qytetit përfshi sheshin “Skënderbej” dhe një pjesë e bulevardit. “Siç e shohim nga pjesëmarrja e njerëzve është një ndjesi e bukur që të kemi mundësi që qytetin ta shijojmë në këmbë, pa makina dhe është një mënyrë interesante dhe e re e të jetuarit së bashku”, shtoi nënkryetari i Bashkisë së Tiranës, Arbian Mazniku.

Ai theksoi se Bashkia e Tiranës është në fazën e fundit të përcaktimit të detajeve për projektin e sheshit “Skënderbej” dhe se shumë shpejt do të fillojmë punimet që pritet të zgjasin rreth një vit. Interesit të gazetarëve në lidhje me ecurinë e projektit të “Unazës së Vogël” ai iu përgjigj se pavarësisht pengesave që i janë bërë zbatimit të tij, Bashkia e Tiranës është e vendosur që të gjeje zgjidhjet e duhura në mënyrë që edhe ky segment i Unazës të hapet për makina dhe të mundësohet kështu nisja e punimeve të sheshit “Skënderbej”.

“Ne besojmë se në ditët në vijim, kjo çështje gjithashtu do të mbyllet dhe do të kemi mundësi që Unazën ta përfundojmë së shpejti. Pjesë e aspiratës sonë ka qenë që të hapim fillimisht plotësisht Unazën dhe vetëm pasi ta kemi hapur plotësisht Unazën, të kemi mundësi që të hapnim më pas punimet në shesh për ta bërë atë pedonal. Besoj se ky nuk do të jetë një problem madhor dhe do kemi mundësi ta zgjidhim shumë shpejt dhe ta vendosim sheshin në punë”, u shpreh Mazniku.

Duke filluar që në orët e para të ditës së sotme qytetarët e Tiranës kanë pasur mundesi të ndjekin panairin e produkteve bio dhe atë të turizmit të aventurës, projektimin e fotove të kalave në rrethina, si dhe monumenteve të natyrës, stendën e profesionistëve që punojnë me materiale të riciklueshme ose panairin e organizatave mjedisore. Gjithashtu më të vegjlit kanë pasur mundësi të bëhen pjesë e festivalit të balonave, të luajnë në mini fushat e basketbolli, tenisit, futbollit, si dhe të ndjekin koncertet e ndryshme të organizuara nga “Tirana Art Fest”, Qendra për fëmijë “Bujar Alliu”, “Bras Band Uart, grupet “All Band”, “Latin Beat”.

Ndërkohë që një grup i piktorëve të vegjël kanë kanë pikturuar sheshin “Skënderbej” dhe godinat përreth. Gjithashtu, Bashkia e Tiranës kishte bërë të mundur që këtë ditë ta shfrytëzojë edhe për t’i prezantuar qytetarëve projektin e transformimit të sheshit “Skënderbej”. Ata kanë pasur mundësi që nëpërmjet syzeve VR të shikojnë në dimensionin 3D se si sheshi “Skënderbej” do jetë pas një viti kur edhe të kenë përfunduar punimet.