Eliminimi i mësimit me dy turne nis nga gjimnazi ‘Qemal Stafa’.

Nxënësit e shkollës së mesme “Qemal Stafa” do të kenë një godine të re të rikonstruktuar plotësisht dhe ambiente të tjera shtesë, që do të shmangin zhvillimin e mësimit me dy turne. Kryetari i Bashkisë së Tiranës, Erion Veliaj, ishte i pranishëm në shkollën “Qemal Stafa”, nga ku tha se 1600 nxënësit e shkollës që përfitojnë nga ky investim do të kenë një ambient dinjitoz, ku përfshihen edhe hapësira të reja sportive e mësimdhënieje.

“Për 1600 nxënësit që ndjekin gjimnazin “Qemal Stafa”, nuk ka dhuratë më të mirë për këtë vit të ri, se sa një shkollë e re, e cila i kryen orët e mësimit paradite dhe eliminon klasat me dy turne. Por, besoj se kjo shkollë vjen si standard i ri dhe shembulli që duam ta përdorim edhe për shkollat e tjera të Tiranës”, tha Veliaj. Ai falenderoi kompanitë, inxhinierët e bashkisë, kontraktorët, të gjithë punonjësit, të cilët punuan për rikonstruksionin në kohë të gjimnazit “Qemal Stafa”.

Duke vlerësuar këtë shkollë të mesme, kryebashkiaku Veliaj tha se ky është gjimnazi i parë nga ku fillon mbajtja e premtimit për eliminimin e klasave me dy turne. “Ky gjimnaz ka pasur një anomali në marrëdhënien me bashkinë për një kohë të gjatë. Më vjen mirë që kjo është zhbllokuar dhe puna vijon gjatë gjithë ditës. Besoj se këtë 7 mars do të kemi një hapësirë totalisht të re dhe një hapësirë cilësore mësimdhënieje, jo vetëm brenda klasave, por edhe me kushtet e reja në palestër dhe në ambientet e tjera sportive”, u shpreh Veliaj.

Kryebashkiaku solli në vëmendje se ky vit përkon me ambicien e Bashkisë së Tiranës për të vijuar me ndërtimin e shkollave të reja, nëpërmjet partneritetit publik-privat. “Dua të falenderoj gjithë qytetarët që mbështetën nismën e bashkisë, për të shkëmbyer tarifën për gjelbërimin, shkurret dhe pemët dekorative, me një projekt edhe më fisnik, siç është projekti i ndërtimit të shkollave në Tiranë”, theksoi Veliaj. Ai shprehu besimin se ata që merren me mësimdhënien dhe ata që investohen me mish e shpirt për cilësinë arsimore nuk do të duhet ta bëjnë këtë në kushtet e klasave me dy turne, klasave pa ngrohje, e 4-5 nxënësve në një bankë.

“Më vjen mirë që ky projekt fantastik është në këtë shkollë ku shërbehet me shumë dashuri dhe seriozitet. Më në fund, pasioni i mësuesve mbështetet edhe nga pasioni i bashkisë për të bërë punë cilësore dhe për t’u siguruar që për më të mirët e Tiranës, ofrojmë edhe shërbimin më të mirë”, përfundoi Veliaj.

Për të krijuar kushtet e duhura mësimore, Bashkia e Tiranës ka vendosur ndërhyrjen në shkollën “Qemal Stafa” duke bërë jo vetëm rikonstruksionin e plotë, por edhe duke shtuar klasat dhe laboratorët. Paralelisht me ambientet ku do të zhvillohen mësimi po ndërtohet dhe palestra e shkollës. Në përfundim të këtij projekti, shkolla do të ketë 34 klasa, 5 laboratorë, zyrat e shkollës për sallë mbledhjesh, psikolog, dentist dhe ambiente të tjera ndihmëse të cilat janë të shpërndarë në katër katet e godinës, nga tre që është aktualisht.