Gati për “Maratona e Tiranës”

Nesër, më datë 9 Tetor 2016, ora 9.00, më shumë se 1200 persona, jo vetëm nga Shqipëria, por edhe nga gjitha trojet shqiptare në vendet fqinje, do të vrapojnë në “Maratonën e Tiranës 2016”, e organizuar nga Bashkia e Tiranës në bashkëpunim me Federatën Shqiptare të Atletikës. Një organizim me përmasa të tilla ndodh për herë të parë në vendin tonë dhe ai synon ta fusë Tiranën në hartën e maratonave që organizohen në shumë qytete të botës. Nisur pikërisht nga pjesëmarrja e madhe, Bashkia e Tiranës i ka bërë edhe një herë thirrje sot të gjithë qytetarëve të saj, që gjatë pjesës së parë të ditës së nesërme, nga ora 9.00 deri në 14.00, të shmangin në maksimum daljen me automjete dhe lëvizjet në aksin rrugor ku do të kalojë maratona.

Nëpërmjet një deklarate për shtyp, nënkryetari i Bashkisë së Tiranës, Andi Seferi, u kërkoi qytetarëve që të jenë bashkëpunues dhe të mos përdorin makinën gjatë paradites, por mund t’i bashkohen maratonës e ta ndjekin atë nga afër. “Është normale që nga 365 ditë të vitit, ku qyteti është i automjeteve, një gjysmë dite të jetë edhe i kalimtarëve, qytetarëve, vrapuesve që duan t’i bashkohen maratonës. Qytetarët që dëshirojnë të dalin nga qyteti nesër, mund të konsultohen me ëebsite e Bashkisë së Tiranës apo me deklaratat e mëparshme të bashkisë, për të gjetur akset alternative. Aksi kryesor ku do të zhvillohet maratona është përgjatë Rrugës së Durrësit, Rrugës Dritan Hoxha, deri në kthesën e Rinasit. Rrugët që lidhen me këtë aks do të jenë të bllokuara deri në orën 14.00 dhe për këtë arsye ftoj të gjithë qytetarët në zgjidhje alternative dhe të mos e përdorin makinën nesër gjatë kësaj periudhe kohore”, tha Seferi. Ai i bëri thirrje qytetarëve të Tiranës që ta mbështesin maratonën dhe ta kthejnë ditën e nesërme si një ditë feste.

“Ftoj edhe një herë qytetarët e Tiranës ta kalojmë së bashku këtë ditë, ashtu sikurse tashmë kemi gjetur mirëkuptimin e tyre në të gjitha aktivitetet e organizuara në të kaluarën, si “Tirana pa makina” dhe “Java e Mobilitetit”. Edhe kësaj radhe duhet ta shijojmë së bashku këtë maratonë, këtë festë sportive”, shtoi Seferi. Më tej, ai sqaroi edhe një herë se startimi i maratonës bëhet nesër në orën 09.00, në sheshin përballë Muzeut Historik Kombëtar, do të vijojë përgjatë rrugës së Durrësit, do të vijojë te rruga “Dritan Hoxha”, për të arritur tek kthesa e aeroportit të Rinasit, në njësinë administrative të Kasharit. Seferi tha se për mbarëvajtjen e kësaj maratone Bashkia e Tiranës ka angazhuar në terren mbi 750 punonjës të saj dhe vullnetarë, duke filluar nga filluar që nga ndërmarrjet e punëve publike, Agjencia e Parqeve dhe zjarrfikëset, që do jenë në ndihmë të këtij eventi të madh. Ndërsa, Policia Bashkiake, në bashkëpunim me Policinë e Shtetit, ka marrë të gjitha masat që kjo festë sportive të vijojë e të mbyllet nën një kontroll të plotë.

Ai theksoi se ky aktivitet, i pari i organizuar në qytetin tonë, ka si synim përveç vijimësisë politikave në lidhje me sportin që Bashkia e Tiranës ndërmerr, por edhe regjistrimin e Tiranës në listën e qyteteve ku organizohen maratonat ndërkombëtare. Pikërisht, për këtë arsye ai theksoi se Bashkia e Tiranës është e angazhuar për të ndjekur të gjitha rregullat dhe standardet ndërkombëtare në maratonën e nesërme.

Partnerët e Bashkisë së Tiranës në këtë organizim janë Ministria e Kulturës dhe Sportit, Federata Shqiptare e Atletikës. Pjesë e rëndësishme për organizimin e kësaj maratone janë edhe Vodafone Albania, World Vision (të cilët do të vrapojnë me kauzën në mbrojtje dhe mbështetje të fëmijëve), Agna Group, EcoVolis, Birra Peja, Adidas, Fifth Element dhe Rauch.

Itinerari

Bashkia e Tiranës ka publikuar planin e lëvizjes së automjeteve gjatë zhvillimit të aktivitetit, si dhe hartën e itinerarit të maratonës të cilin mund ta gjeni duke klikuar këtu: http://maratonaetiranes.al/sq/intenerari/

Në Maratonën e Tiranës (nisja bëhet përpara Muzeut Kombëtar) do të marrin pjesë 4 kategori:

Fun Run – 1km, për nxënësit e shkollave të mesme;

Hand Bike – 2 km, për personat paraplegjikë;

Run (femër/mashkull) 10 km, çdo qytetar shqiptar apo i huaj;

Half Marathon (femër/mashkull) 21 km, çdo qytetar shqiptar apo i huaj.

Kjo maratonë është një mundësi e mirë argëtimi dhe ushtrimi të aktivitetit sportiv  në qytet, si dhe ndihmon për ta kthyer fokusin  në aktivitete me bazë angazhimin fizik.

Më poshtë gjeni me detaje planin e lëvizjes së automjeteve gjatë kohës që do të zhvillohet Maratona e Tiranës.

  1. Qarkullimi i automjeteve gjatë zhvillimit të “Maratona e Tiranës 2016”, me itenerar fillimi dhe mbarimi kryqëzimi i rrugës së Durrësit me rr. “Dedë Gjo Luli”, duke vazhduar përgjatë rrugës së Durrësit – rr. Dritan Hoxha – rr. 29 Nëntori – deri në mbikalimin e “Rinasit”, do të bëhet i kufizuar si më poshtë:
  1. Ndalohet qarkullimi në rrugën “Dedë Gjo Luli”
  • Në kryqëzimin e bulevardit “Zogu I” (sipas sensit veri-jug) me rrugën “Fortuzi”, drejtim i detyruar djathtas.
  • Në kryqëzimin “Rruga e Kavajës” (sipas sensit perëndim-lindje) me rrugën “Dedë Gjo Luli”, drejtim i lejuar djathtas.
  • Në kryqëzimin “Rruga e Dibrës” (sipas sensit lindje-perëndim) me bulevardin “Zogu I”, drejtim i detyruar djathtas.
  1. Ndalohet qarkullimi në “Rrugën e Durrësit”.
  • Në kryqëzimin e rrugës “Fortuzi” (sipas sensit lindje-perëndim) me rrugën “Mine Peza”, drejtim i detyruar djathtas.
  • Në kryqëzimin e rrugës “Mine Peza” me rrugën “e Bogdanëve”, drejtim i detyruar drejt.
  • Në të gjitha rrugët që kryqëzohen me rrugën e Durrësit pezullohet sensi dalës për në këtë rrugë.
  1. Kufizohet qarkullimi në sheshin “Karl Topia”.
  • Pezullohet qarkullimi në rrugën “Muhamet Gjollesha” (segmenti Sheshi “Karl Topia” – rruga “Sandër Prosi”) sipas sensit hyrës në shesh jug-veri. Sensi dalës i rrugës “Muhamet Gjollesha” nga Sheshi “Karl Topia” është i hapur.
  • Në kryqëzimin e rrugës “Asim Vokshi” (sipas sensit lindje-perëndim) me rrugën “Don Bosko”, drejtim i detyruar djathtas, kurse drejt vetëm për mjetet e emergjencës dhe shërbimit urban qytetës.
  • Në kryqëzimin e rrugës “Mine Peza” me rrugën “Asim Vokshi”, drejtim i detyruar drejt-djathtas.
  1. Kufizohet qarkullimi në rrugën “Dritan Hoxha”.
  • Pezullohet qarkullimi në rrugën “Dritan Hoxha” sipas sensit jug-veri. Gjatë zhvillimit të aktivitetit korsia e dedikuar është e hapur në shërbim të mjeteve të emergjencës dhe shërbimit urban qytetës. Sensi veri-jug i rrugës “Dritan Hoxha” është i hapur.
  • Në të gjitha rrugët në anën lindore që kryqëzohen me rrugën “Dritan Hoxha” pezullohet sensi dalës për në këtë rrugë.
  • Në kryqëzimin e rrugës “Dritan Hoxha” me “Lord Bajronin” sipas sensit të lejuar për qarkullim, drejtim i detyruar drejt.
  • Në kryqëzimin e rrugës me “Lord Bajronin” me “Gjergj Legisi”, drejtim i detyruar djathtas.
  1. Kufizohet qarkullimi në sheshin “Shqiponja”.
  • Në kryqëzimin me rrethrotullim të sheshit “shqiponja” me rrugën “Vangje Noti”, drejtim i detyruar djathtas.
  • Në kryqëzimin e rrugën “Teodor Keko” me “Dritan Hoxha kalimi në rrethrotullim, drejtim i detyruar djathtas.
  • Në kryqëzimin e rrugën “29 Nëntori” me “Teodor Keko” kalimi në rrethrotullim, drejtim i detyruar drejt-djathtas.
  1. Kufizohet qarkullimi në rrugën “29 Nëntori”.
  • Pezullohet pjesërisht qarkullimi në rrugën “29 Nëntori” sipas sensit jug-veri. Gjatë zhvillimit të aktivitetit dy korsi lëvizjeje do të jenë të lira për qarkullim.
  • Në hyrje të mbikalimit sipas sensit jug-veri, ndalohet qarkullimi drejt për në autostradë. Të gjitha mjetet që lëvizin në korsitë e rezervuara devijim i detyruar djathtas.
  • Sensi veri-jug i rrugës “29 Nëtori” është i lirë.
  1. Iteneraret e linjave urbane që preken nga ky plan ndërpriten gjatë zhvillimit të aktivitetit.
  1. Të gjitha kufizimet e përshkruara më sipër janë në fuqi më datë 9.10.2016, nga ora 05:00 deri 14:00.