Praktikë Pune Verore pranë Muzeut Vendor “Shtëpia Studio Kadare”

THIRRJE E HAPUR
Praktikë Pune Verore pranë Muzeut Vendor “Shtëpia Studio Kadare”
2 (dy) pozicione

Muzeu Vendor “ Shtëpia Studio Kadare” është një institucion varësie në Bashkinë Tiranë, i krijuar me Vendimin nr. 28, datë 2.05.2019 të Këshillit Bashkiak Tiranë.
Muzeu vendor “Shtëpia Studio Kadare”, ka për funksion kryesor shpalosjen, njohjen dhe promovimin e veprës letrare të shkrimtarit të njohur Ismail Kadare.
“Shtëpia Studio Kadare”, lindur më së pari si një muze qytetës, është mirëfilli edhe një hapësirë kulturore e cila shtjellohet në apartamentin ku shkrimtari Ismail Kadare banoi nga viti 1974 deri në fillim të vitit 1990. Fuqia e kësaj hapësire qëndron te natyra dhe funksionet e shumëfishta të saj qysh se lindi. Ky apartament nuk ishte vetëm vendbanimi i Kadaresë, por edhe vendi i tij i punës, meditimit e krijimit, dhe si i tillë ai përfaqëson një portë për në auditorin e kulturës së pasluftës. E organizuar në 6 dhoma, Shtëpia Studio Kadare është një mikrounivers autentik prej të cilit kushdo del duke marrë me vete një vetëdijsim të mirë e thuajse të plotë mbi veprën e Kadaresë.
Fondi i Shtëpisë Studio Kadare përfshin shumëllojshmëri materialesh burimore. Ai kryesisht përbëhet nga mbi 1000 libra të autorit, një pjesë e të cilëve bartin dedikime, tregues të thurjes sociale të kohës, apo përkthime poezish të pabotuara ndonjëherë të Ismail Kadaresë. Gjithashtu si pjesë të tij mund të numërojmë dorëshkrime dhe daktilografime të autorit dhe të së shoqes, shkrimtares Elena Kadare, fotografi origjinale personale dhe familjare, objekte dhe sende të autorit, kopje të para të botimeve të ndryshme si dhe element të tjerë të cilët e kontenstualizojnë studjuesin në hapësirën kulturore të pasluftës.

• Nëse ke një diplomë të nivelit Bachelor në gjuhësi, letërsi, trashëgimi kulturore apo fusha të ngjashme me to;
• Ke dëshirë të krijosh një eksperiencë të veçantë pranë një muzeu;
• Je i/e aftë të procesosh sasi të bollshme informacioni;
• Merresh natyrshëm me njerëzit duke treguar aftësi të shkëlqyera mikpritëse.

Lutemi të na dërgosh një CV dhe Letër Motivimi në adresën: praktika@tirana.al

Afati i fundit i aplikimit është data 30 korrik 2021!

Faleminderit!