Anketime

Bashkia e Tiranës është një institucion vendor, që ofron një numër të madh shërbimesh, të cilat janë të prekshme përgjithësisht nga qytetarët, subjektet fizike dhe juridike, por gjithashtu edhe nga vizitorët vendas e turistët e huaj. Ky institucion ka në fokus të përhershëm përmirësimin e cilësisë së shërbimeve vendore drejt arritjes së standardeve optimale, me qëllim për t’u shndërruar në një kryeqytet model evropian. Në këtë kuadër, falë vizionit transformues të kryeqytetit, janë ndërmarrë një sërë nismash, projekte dhe investime që kryhen për herë të parë, apo për përmirësimin e atyre ekzistuese. Me qëllim për të matur apo testuar nevojën e secilit projekt dhe investim, Bashkia e Tiranës realizon dëgjesa, konsultime publike dhe sondazhe specifike. Anketimet periodike kryhen nëpërmjet Sektorit të Konsultimit Publik dhe Opinioneve Qytetare në Drejtorinë e Komunikimit me Qytetarë për të hulumtuar opinionin publik lidhur me shërbimet bashkiake, cili është perceptimi qytetar mbi veprimtarinë e Bashkisë, çfarë do të donin të ndryshonin apo të përmirësonin nga shërbimet ndaj publikut.