Projekti " Shkolla Qendër Komunitare"

Informacion i Përgjithshëm mbi Projektin dhe Qëllimi i tij

Bazuar në Vendimin e Këshillit Bashkiak  Nr. 144, datë   23/12/2022 “Për miratimin e përdorimit të palestrave të shkollave të arsimit 9-vjeçar dhe të mesëm për zhvillimin e aktiviteteve  sportive pas programit mësimor dhe në ditët e pushimit”.

Projekti “Shkolla Qendër Komunitare” nis me shfrytëzimin ambjenteve sportive të institucioneve arsimore parauniversitare publike në Bashkinë Tiranë nga Federatat Sportive, Shoqatat Sportive, Klubet Sportive, për edukimin, ndërgjegjësimin dhe përhapjen tek të rinjtë të kulturës së ndjekjes së shumë sporteve në qytetin e Tiranës. 

Bashkia Tiranë, përmes mirë menaxhimit të ambjenteve sportive të institucioneve arsimore parauniversitare publike në Bashkinë e Tiranës dhe nëpërmjet këtij projekti, synon të nxisë të rinjtë dhe fëmijët të angazhohen në ushtrimin e sporteve të ndryshme si dhe të evidentojë fëmijët që mund të kenë talente në sporte specifike, me fokus formimin e fëmijëve në aspektin fizik dhe mendor, si mjet për të luftuar sedentarizmin dhe për të shmangur çdo formë të shfaqjeve negative të kohës, obezitetin, si dhe  zhvillimin e miqësive ndërmjet të rinjve, duke u përfshirë në aktivitete sportive.  

Nxitja e bashkëpunimit ndërmjet Federatave Sportive, Shoqatave Sportive, Klubeve Sportive dhe Bashkisë së Tiranës, duke krijuar një skemë efektive me qëllim përmirësimin e jetës dhe shëndetit të komunitetit përmes shfrytëzimit të ambienteve sportive dhe mjediseve plotësuese të tyre (dhoma zhveshje; tualete dhe ambjente për bazë materiale), pranë institucioneve arsimore publike parauniversitare të Bashkisë Tiranë, jashtë kohës që zhvillon veprimtarinë institucioni arsimor, garantimit të pastërtisë së ambienteve gjatë ushtrimit të aktiviteteve sportive, pas konfirmimit të drejtorit të shkollës mbi mos cënimin e standardeve të veprimtarive mësimore dhe grafikut të aktiviteteve.

Objektivat Specifike dhe Rezultatet e Pritshme

Promovimi dhe implementimi i sporteve si një mundësi edukimi fizik dhe argëtimi për fëmijët e shkollave të ciklit 9-vjeçar dhe atij të mesëm;
Gjithëpërfshirje të shtresave sociale dhe integrimin e tyre në shoqëri, nëpërmjet sportit si gjenerator i shëndetit të mirë dhe zhvillimit të qëndrueshëm e të vazhdueshëm të mirëqenies së qytetarëve.
    
Ndihmesën në zhvillimin e shëndetit, zhvillimin e cilësive fizike, shprehive motorike e koordinative si dhe në vlerat shoqërore të fëmijëve duke ushtruar një sport;

Formimin e fëmijëve në aspektin fizik dhe mendor përmes përfshirjes në aktivitete sportive, si mjet për të luftuar sedentarizmin,  obezitetin apo çdo formë tjetër të shfaqjeve negative të kohës, si dhe duke krijuar kushte për zhvillimin e miqësive midis nxënësve;

Mundësimi i përfshirjeve dhe realizimit të garave sportive në dobi të shëndetit dhe zhvillimit të aftësive motorike, në shërbim të rritjes së cilësisë së jetesës.

Evidentimi i rolit të mësuesit (trajnerit), si ekspert dhe edukator i rëndësishëm për fëmijët;
Rritja e interesit të fëmijëve ndaj sporteve;

-    Federatat Sportive, Shoqatat Sportive, Klubet Sportive duhet të mbështesin integrimin në aktivitete sportive pa pagesë të fëmijëve dhe të rinjve të cilët vijnë nga grupe sociale vulnerabël (fëmijët nga familje në nevojë, jetimë, PAK, personat me aftësi ndryshe, ndihmë ekonomike etj.);

Federatat Sportive, Shoqatat Sportive, Klubet Sportive angazhohen që 5 (pesë) orë gjatë javës të ofrojnë aktivitete sportive pa pagesë në shërbim të komunitetit;

 Krijimi i traditës ndaj sporteve dhe përmirësimi i infrastrukturës së nevojshme për këtë qëllim;

Rritja e interesit të fëmijëve dhe komunitetit ndaj sportit.
 

Aplikantët e Pranueshëm

Federatat Sportive, Shoqatat Sportive, Klubet Sportive aplikojnë pranë Bashkisë së Tiranës me anë një Formular Aplikimi (Aneks 1) ku shprehin interesin për të ushtruar aktivitetin e tyre, në sportin specifik, në palestrën e shkollës ose ambienteve sportive, pas orëve të mësimit. Federatat Sportive, Shoqatat Sportive, Klubet Sportive duhet të jenë subjekte të regjistruara sipas legjislacionit në fuqi, që përcakton rregullat për themelimin, regjistrimin, funksionimin, organizimin dhe veprimtarinë e tyre duke paraqitur të gjithë dokumentacionin e nevojshëm që e vërteton këtë, si më poshtë vijon. Dokumentet shoqëruese të cilat duhet të dorëzohen në origjinal ose në kopje të njësuara me origjinalin:
a) Aktin e regjistrimit në gjykatë;
b) Kopjen e statutit, ku specifikohet si pjesë e veprimtarisë ofrimi i aktiviteteve sportive;
c) Programi i aktiviteteve qe do te realizohen (shtojca C).
d) Dokumentacionin që provon përvojë në ofrimin e aktiviteteve sportive, të paktën në 3 (tri) vite të veprimtarisë së tyre, duke përfshirë, si më poshtë vijon:
-    Listën e plotë të aktiviteteve të zhvilluara nga organizata (fondacioni, shoqata, klubi sportiv) gjatë 3 (tri) viteve dhe të dhëna statistikore për përfituesit e shërbimit;
-    Raportet përfundimtare për secilin nga aktivitetet e listuara, si dhe pasqyrat financiare;
-    Buxhetin total të secilit projekt, donatorët përkatës, si dhe listën e trajnerëve të përfshirë në këto aktivitete;
e)   Vërtetimin nga organet tatimore që i ka përmbushur në mënyrë të rregullt detyrimet;
f) Vërtetim nga gjykata se nuk është në procedurë falimenti dhe/ose likuidimi;
g) Vërtetim nga prokuroria dhe gjykata se anëtarët e organit më të lartë vendimmarrës dhe të organit ekzekutiv nuk janë në proces hetimi apo gjykimi për çështje që cenojnë besimin e publikut dhe ofrimin e përshtatshëm të veprimtarive sportive;
gj) Formularin e gjendjes gjyqësore të anëtarëve të organit më të lartë vendimmarrës dhe të organit ekzekutiv.
h) Adresën elektronike (e mail) dhe nr. telefoni të komunikimit.

Proçesi i Aplikimit

• Në fillim të çdo muaji Bashkia e Tiranës do të shpallë thirrje për aplikim për projektin, duke filluar nga muaji Janar. Të interesuarit do të mund të aplikojnë brenda 3 javëve të para të çdo muaji. Më poshtë paraqitet kalendari i aplikimeve për projektin deri në muajin Dhjetor.

•    Aplikimet që do të dorëzohen pas afatit të caktuar nuk do të pranohen.
•    Aplikuesi dorëzon dokumentat pranë zyrave të Drejtorisë së Përgjithshme të Promovimit të Qytetit, Bashkia Tiranë (Pritja me Qytetarin):

          Aplikimi i plotësuar dhe i firmosur (Aneks 1)
          Plan pune paraprake, në lidhje me zhvillimin e projektit
          Vendim gjykate, Statut, Akt themelimi, NUIS, Vërtetim për statusin e aplikuesit në aplikacionin e-Albania
          CV e Federatës Sportive/Shoqatës Sportive/Klubit Sportiv

•    Shpallja e fituesit të secilës thirrje bëhet në faqen Web të Bashkisë Tiranë, si dhe i komunikohet aplikuesit në kontaktin e vënë në dispozicion prej tij në formularin e aplikimit.