Shpërndaje
Open Data është filozofia që mbështet shpërndarjen dhe publikimin e lirë të të dhënave pa kufizime ligjore, patenta apo mekanizma të tjerë kontrolli.
Prej datës 19 Prill 2017, Bashkia e Tiranës me mbështetjen e UNDP-së, u bë bashkia e parë në Shqipëri që ka krijuar portalin Open Data. Ky portal synon të rrisë transparencën dhe u ofron qytetarëve të dhëna të ndryshme për punët, investimet dhe çdo shërbim që kryhet në qytet pa asnjë kosto. Këto të dhëna mund të shkarkohen në pajisje elektronike dhe mund të përdoren më pas për qëllime informative, studimore, akademike, gazetari etj. Të dhënat janë lehtësisht të aksesueshme dhe përditësohen në mënyrë të vazhdueshme për t’i siguruar qytetarëve transparencë maksimale.
Informacioni nuk konsiderohet më si një e drejtë e institucionit që e krijon atë, por si një mjet për të qenë i aksesueshëm dhe i dobishëm për qytetarët. Nga ana tjetër, portali ndihmon bashkinë për të përcaktuar se cilat janë prioritet në punët e qytetit dhe politikëbërësit gjatë procesit të vendimmarrjes. Portali është i organizuar në 9 kategori kryesore. Secila kategori ndahet në disa nënkategori, të cilat paraqesin të dhënat statistikore përkatëse sipas frekuencave të përcaktuara. Ky kategorizim është kryer në bazë të funksioneve që ka Bashkia Tiranë të përcaktuara në ligjin nr.139/2015, dt.17.12.2015, “Për vetëqeverisjen vendore”, si dhe duke vrojtuar vit pas viti se cilat janë fushat të cilat paraqesin më shumë interes për përdoruesit e statistikave.
Gjatë krijimit të portalit dhe përditësimit të vazhdueshëm të të dhënave të tij, janë marrë parasysh parimet mbi të cilat mbështetet Open Data. Konkretisht, të dhënat duhet të jenë:
- tё plota dhe autentike (nё nivelin mё tё detajuar tё mundshёm, jo nё forma tё pёrmbledhura ose tё modifikuara)
- lehtësisht tё aksesueshme
- të disponueshme pёr tё gjithё (pa asnjё kёrkesё pёr regjistrim, burokraci ose humbje kohe)
- tё disponueshme pa kufizim licence
- tё pёrpunueshme në portal (p.sh. paraqitje grafike)
Link: opendata.tirana.al
Shpërndaje